• केशब चापागाईं 
  

झापा । 

जोरमाई युवा क्लब झापा गाउँपालिका–२ सडकबारीको आयोजनामा जारी खुल्ला नकाउट फुटबल प्रतियोगितामा आज सोमबार दुई खेल सम्पन्न भएका छन्।

सडकबारीको खेल मैदानमा भएको पहिलो खेलमा आयोजक टिमलाई ४–१ को गोलान्तरले हराउँदै कनकाई बिजयी बनेको छ।आयोजक टिमले सुरुवात देखि बर्चस्व कायम गरेको खेलको पहिलो हाफको १६ मिनेटमै कनकाईका आशिष लावतीले एक गोल गरेका थिए।

आक्रामक देखिएको आयोजक गोलको बद्ला लिन दोस्रो हाफमा सुरुवात देखिनै आक्रामक बनेको थियो। दोस्रो हाफको छैठौं मिनेटमा आयोजकका तर्फबाट अनिश खड्काले १ गोल लगाउदै बराबरीमा पुर्याएका थिए। तर बराबरी भने धेरै समय टिक्न सकेन एघारौं मिनेटमा रोहित शर्माले पुनः १ गोल थप्दै कनकाईलाई अग्रता दिलाए।

कनकाईलाई अझै गोल थप्न पेनाल्टी सुट आउट हान्ने मौका मिल्यो। पेनाल्टीको अवसर नगुमाई युकेश तामाङले एक गोल थपे।आक्रामक देखि शिथिल अबस्थामा पुगेको आयोजक टिमलाई पुनः रोहित शर्माले एक गोल थपे। उनी उक्त खेलका म्यान अफद म्याच रोहित घोषित भए।

त्यस्तै सयपत्री युवा क्लब अर्जुनधारा र जलथल फुटबल क्लब बिच भएको दोस्रो खेलमा ट्राइब्रेकरमा ४–१ गोलान्तरले जलथल बिजयी बनेको छ। निर्धारित समयमा १–१ गोलको बराबरी भएपछि खेल ट्राइब्रेकरमा धकेलिएको थियो। ट्राइब्रेकरको अबसरलाई जलथलले सदुपयोग गरेको छ। यस प्रतियोगितामा सयपत्रीका सौगात गोम्देन म्यान अफद म्याच घोषित भए।

प्रतियोगितामा प्रथम विजेता टिमले ५० हजार ९ सय ९९ उपविजेता टिमलाई ३० हजार ९ सय ९९ रुपैयाँ नगदसहित ट्रफी र मेडल प्रदान गरिने क्लवका अध्यक्ष बाबुराम लिम्बुले बताए ।